നാടു വിട്ട് പോകുന്ന മോഹങ്ങൾ.

എന്തോ തീരുമാനിച്ചുറച്ച പോലെ
പൊടുന്നനെ ഒരു ദിവസം
നാടുവിട്ടു പോകുന്ന
ചില മോഹങ്ങളുണ്ട്,

മറ്റൊരു ദേശത്ത്
മഴയായി പെയ്തും
കാറ്റായ് അലഞ്ഞും
വെയിലായി ഉരുകിയും
കാലമായ് ഉരുണ്ടും
പിന്നീടത് ജീവിതം തള്ളി നീക്കും,
അതുമല്ലെങ്കിൽ,
തിളയ്ക്കുന്ന മരുഭൂമിയിൽ
അകലെ എവിടെയോ
എന്നോ കൈമോശം വന്ന
ഹരിത സ്വപ്നങ്ങൾ
മനസ്സിൽ സൂക്ഷിച്ച്
മുടന്തി നടക്കുന്ന
ഒട്ടകങ്ങളെ പോലെ
മരുപ്പച്ചകൾ തേടി അലയും.
ഉത്സവ പറമ്പിലെയും
കല്യാണ വീട്ടിലെയും
നിറക്കാഴ്ചകളും ബഹളങ്ങളും
മറ്റേതോ ജന്മത്തിലെ
അവ്യക്തമായ ഓർമ്മകൾ പോലെ
തിരികെ മാടി വിളിക്കുമ്പോഴും
എല്ലാം ഇട്ടെറിഞ്ഞ്
തിരികെ പോകാനാവാതെ
വെറുതെയെങ്കിലും വിതുമ്പുന്നവർ .