ശാസ്ത്രം ജയിച്ചു.

ശാസ്ത്രം ജയിച്ചു.

അപ്പൂപ്പന്‍ താടിയും
ഒരു കിലോ ഭാരവും
ഒരുമിച്ച് വീഴുമല്ലോ,
താഴേയൊന്നിച്ച് വീഴുമല്ലോ
തെറ്റില്ലാ ശാസ്ത്രം പറഞ്ഞെതല്ലേ
നിത്യം സത്യമതാവുമല്ലോ
മുറ്റത്തേക്കാരോ വരുന്നുണ്ടെന്നച്ചനെ
താങ്ങിയെടുത്തും കൊണ്ട്.
പുസ്തകം പിന്നെ പഠിച്ചിടാം
അമ്മയെയാദ്യം വീളിച്ചിടട്ടേ.
ആളൂകള്‍ കൂടുന്നല്ലോ
ആരവം കൂടുന്നല്ലോ
അമ്മ കരയുന്നല്ലോ
അച്ഛന്‍ കിടക്കുന്നല്ലോ
തെങ്ങീന്ന് വീണതല്ലേ
അധികം മുറിവില്ലല്ലോ
അരയിലെ ചോരയില്‍
പൊതിയിലായപ്പോളും
കടലാസില്‍ കപ്പലണ്ടി,
നിലവിളി കൂടുന്നല്ലോ
നിലവിളക്കെരിയുന്നല്ലോ
കുളിയും കഴിഞ്ഞുവല്ലോ
വെള്ള പുതച്ചുവല്ലോ
ഞാനൊന്നു തൊട്ടുവല്ലോ
അമ്മയലറുന്നല്ലോ
അച്ഛനെ കൊണ്ട്വോയല്ലോ
കുഴിയിലിറക്കിയല്ലോ
മണ്ണിട്ടും മൂടിയല്ലോ
ആരവം കുറയുന്നല്ലോ
ആള്‍ക്കാര്‍ കുറയുന്നല്ലോ
അച്ഛന്‍ വരുകില്ലല്ലോ
അമ്മയെ തല്ലില്ലല്ലോ
ഞാനുറങ്ങുന്നേരമച്ഛനെ-
ന്നമ്മയെ തോണ്ടി വിളിക്കില്ലല്ലോ
അമ്മ ചിരിക്കില്ലല്ലോ
കട്ടിലനങ്ങില്ലല്ലോ
പുസ്തകം കിട്ടില്ലല്ലോ
സ്ക്ജൂളിലും പോകേണ്ടല്ലോ
അമ്മയ്ക്ക് കൂട്ടായെനിക്കും
നാളെ മുതല്‍ പാത്രം കഴുകാമല്ലോ
ആരാന്റെ വീട്ടില്‍ കഴിയാമല്ലോ
അച്ഛനുമോലയുമൊന്നിച്ച് വീണിട്ടും
ആദ്യമെന്നച്ഛനെത്തി
താഴെയാദ്യമെന്നച്ഛനെത്തി.
അതിലേറെ താഴോട്ടു
ഞങ്ങളും വീണപ്പോള്‍
ശാസ്ത്രം ജയിച്ചുവല്ലോ..