ഒബ്സെസീവ് ഡിസോർഡർ

പിന്നെയും പിന്നെയും
തിരിഞ്ഞ് നോക്കിയിട്ടും
പുറകിലാരുമില്ലെന്നുറപ്പ് വരുത്തിയിട്ടും
ആരോ ഉണ്ടെന്ന തോന്നൽ
മനസ്സേ നീ കാര്യമാക്കേണ്ട,

വീണ്ടും വീണ്ടും കഴുകിയിട്ടും
കയ്യിലെ അഴുക്ക്
പോയില്ലെന്ന ചിന്തയാൽ
വീണ്ടും വീണ്ടും കഴുകി
സമയം കളയണ്ട,
വാതിൽ നന്നായടച്ചിട്ടും
തഴിട്ടോ ഇല്ലയോ
എന്ന സംശയം
താഴിട്ട് പൂട്ടി മറന്നേക്കുക,
തലയ്ക്ക്പുറകിലൊരു
ചുറ്റികയടി നിർത്താതെ
ദ്രുതതാളം മുഴക്കുമ്പോൾ
വെറുതെ നനയുന്ന കണ്ണുകളീൽ
അറിയാതെ പോകുന്ന
എത്രയോ ദീർഘനിശ്വാസങ്ങളിൽ
മരുന്നിന്റെ മരവിപ്പിൽ
അവ്യക്ത സ്വപ്നങ്ങളുടെ
ഉറക്കമില്ലായ്മയിൽ,
നീയെന്ന ചിന്തയുടെ
അപനിർമ്മാണത്തെ
ഞാനെന്ന ബോധവുമായി
വെറുതെ കൂട്ടിക്കുഴക്കണ്ട,
എന്തിനെന്ന ചിന്ത തന്നെ
എന്തിനെന്ന തോന്നൽ
ഇനിയും വലിച്ചിഴക്കുന്ന
ചിന്തയുടെ നിലയ്ക്കാത്ത
മായാവലയത്തിൽ നിന്നും
പുറത്ത് വരാനാവാതെ
എന്നെ വലയ്ക്കുന്ന
മനസ്സേ നിനക്ക് സ്തുതി !