ചിത്രം വരയ്ക്കുമ്പോള്‍

അവൻ വലിയൊരു കടലാസ്
  നിവർത്തി വെച്ച്
പ്രപഞ്ച ചിത്രം
വരയ്ക്കുക  ആയിരുന്നു
ഭൂമിയാണാദ്യം വരച്ചത്
ആകാശവും നക്ഷത്രങ്ങളും
മേഘങ്ങളും  നിലാവും
അതിനു കീഴെ 
കരിമ്പാറക്കെട്ടുകളും  കടലും
  കരിമണലും  വീടുകളും
മലയും വരച്ചു

പ്രണയം വരച്ച്   ബാക്കി വന്നതിൽ
കുറേ  സ്ഥലം മരുപ്പച്ചയുടെ
മുൾച്ചെടികളും  പൊടിക്കാറ്റും   ചേർത്ത്
   മരുഭൂമിയ്ക്കായി മാറ്റിവെച്ചു

ഇനിയും വരയ്ക്കാനേറെയുണ്ട്
കാടും മരങ്ങളും  കാട്ടാറുകളും
മഴയും പുഴയും .
.മഴയെ  മണ്ണിലേക്ക്
  ചേർത്ത് നിർത്തിയും
കാട്ടാറുകളെ  കുടിലുകൾക്കരികിലൂടെയും
പുഴയെ   തുള്ളിച്ചാടിച്ച് 
മെല്ലെ ചിരിപ്പിച്ച്
 കടലിലേക്കും വരച്ചൊഴുക്കി

അവസാനം കടലാസിൽ
അവിടവിടെയായി  അവ്യക്തമായി
ജീവിതം  വരച്ചുകൊണ്ടിരിക്കെ
വരണ്ട്  പോയ
ചായക്കുപ്പികളിൽ
ഒരു തുള്ളി വെള്ളം ചേർക്കാനില്ലാതെ

 പ്രതീക്ഷകൾ മരിച്ച് കിടക്കുന്ന
നിറങ്ങളെ  നോക്കി
വിതുമ്പൽ ഒതുക്കി
  ഇനിയും പൂർത്തിയാവാത്ത
ചിത്രത്തിൽ തളർന്നുറങ്ങി


അവന്റെ  നിശ്വാസങ്ങൾക്കൊപ്പം
  വരച്ചു  ചാലിച്ച  മേഘങ്ങളും
രാത്രിയുടെ  യാമങ്ങളിൽ 
  എപ്പോളോ ആകാശത്തേക്കുയർന്ന്
മിന്നലും ഇടിയും  കാറ്റും കോളും 
പേമാരിയുമായി   തകർത്ത് പെയ്തു
നനഞ്ഞു കുതിർന്നു പോയിരുന്ന 
കടലാസിൽ പുതിയൊരു ചിത്രം  വരച്ച്
മഴ  അപ്പൊഴും പെയ്തുകൊണ്ടിരുന്നു